پاکستان کرکٹ بورڈ نے گریڈ ٹو کرکٹ ٹورنامنٹ میں قوانین کی خلاف ورزی کرنے پر کرکٹر گوہر علی پر دو سال کی پابندی عائد کر دی ہے جبکہ ڈیپارٹمنٹ سول ایوی ایشن اتھارٹی پر ایک لاکھ روپے کا جرمانہ بھی عائد کیا گیا ہے۔ پاکستان کرکٹ بورڈ کے مطابق گریڈ ٹو پیٹرنز ٹرافی میں پاکستان نیوی نے سول ایوی ایشن اتھارٹی کی ٹیم پر اعتراض کیا تھا کہ اس نے میچ میں گوہر علی کو قوانین کے خلاف میدان میں فیلڈنگ کے لیے بلایا۔
تحقیقات کے بعد اس بات کا انکشاف ہوا کہ گوہر علی نے خیبرپختونخواہ پولیس کے باقاعدہ ملازم ہونے کے باوجود سول ایوی ایشن اتھارٹی کا کنٹریکٹ قبول کیا جو قوانین کی خلاف ورزی ہے۔ اس میچ کے نو پوائنٹس بھی پاکستان نیوی کو دے دیے گئے جس کے بعد سول ایوی ایشن اتھارٹی کی ٹیم ایونٹ کا سیمی فائنل کھیلنے سے محروم ہو گئی۔ گوہر علی نے پی ایس ایل فور میں لاہور قلندرز کی نمائندگی کی تھی۔
