بلوچستان کرکٹ ٹیم کے ہیڈکوچ ارشد خان کو ضابطہ اخلاق کی خلاف ورزی کرنے پر ایک میچ کے لیے معطل کر دیا گیا ہے۔ ارشد خان کو پی سی بی کے ضابطہ اخلاق کے آرٹیکل 2.21 کی خلاف ورزی پر چارج کیا گیا۔
ارشد خان نے آٹھویں راؤنڈ کے میچ میں امپائرز کے قریب جا کر نامناسب زبان کا استعمال کیا جس پر آن فیلڈ امپائرز فاروق علی خان اور ثاقب خان نے ارشد خان کو چارج کیا۔
غلطی ثابت ہونے پر ارشد خان کو میچ ریفری کامران چوہدری نے ایک میچ کے لیے معطلی کی سزا سنائی۔ ارشد خان کی جانب سے اعتراض کرنے پر منگل کے روز سماعت ہوئی جس کے بعد میچ ریفری نے ارشد خان پر عائد سزا برقرار رکھی۔
ارشد خان قائد اعظم ٹرافی کے نویں راؤنڈ میں شرکت نہیں کر سکیں گے۔ بلوچستان اور ناردرن کے درمیان قائد اعظم ٹرافی کے نویں راؤنڈ کا میچ 25 نومبر سے یو بی ایل اسپورٹس کمپلیکس کراچی میں شروع ہو گا۔
